JOHN ANDERSON, my jo, John,   When we were first acquent, Your locks were like the raven,   Your bonnie brow was brent; But now your brow is beld, John,   Your locks are like the snow; But blessings on your frosty pow,   John Anderson, my jo!

John Anderson, my jo, John,   We clamb the hill thegither; And monie a canty day, John,   We've had wi' ane anither: Now we maun totter down, John,   But hand in hand we'll go, And sleep thegither at the foot,   John Anderson, my jo.

jo] sweetheart. brent] smooth, unwrinkled. beld] bald. pow] pate. canty] cheerful.